Comentarios
O retrato enmárcase nun óvalo. A figura, lixeiramente ladeada á dereita, destaca sobre un fondo neutro, verdoso, que se aclara nesta mesma dirección. O personaxe ataviado cun uniforme militar, loce colariño dourado, ombreiras e o distintivo do cordón de ouro que colga do seu ombro dereito. Unha tira branca asoma no colo e ilumínalle o rostro, de mirada serea, tez loira, amplo bigote, mosca e perilla. Esfórzase Fierros por combinar o estudio das calidades co da expresión nun retrato de grande realismo e equilibrada composición que encaixa na liña clásica de retrato academicista.
