Afundación propón con «O mar empeza aquí» pequenas accións individuais para preservar o medio ambiente
Calcúlase que cada ano no mundo 5 billóns de cabichas acaban no mar e cada unha delas pode chegar a contaminar entre 8 e 10 litros de auga. Unha soa goma de mascar pode tardar en desintegrarse ata 1600 anos. Co obxectivo de concienciar sobre o impacto destes e outros pequenos residuos como papeis ou plásticos, que se guindan no chan e chegan directamente ao mar a través da rede de pluviais, nace o movemento internacional «O mar empeza aquí».
Afundación, en colaboración co Concello de Sanxenxo e Portos de Galicia, puxo en marcha hoxe en Portonovo esta campaña de actuación e sensibilización, no marco dos seus programas PLANCTON e «Educación para a sostibilidade». Con eles, a Obra Social de ABANCA pretende promocionar un conxunto de boas prácticas medioambientais que, cun escaso esforzo pola nosa banda, permiten concienciarnos sobre a inmensa relevancia das pequenas accións do noso día a día.
O director xerente de Afundación, Pedro Otero; a concelleira de Servizos Sociais e Maiores de Sanxenxo, Paz Gago; o responsable de Portos de Galicia na provincia de Pontevedra, Héctor Freijo e o director de zona Arousa-Salnés de ABANCA, Víctor Moralejo, foron os encargados de presentar esta mañá a iniciativa, que arrincou coa creación dunha instalación da artista Tania Solla na contorna dun sumidoiro, visibilizando o impacto dos residuos que vertemos ás redes de pluviais. Para incidir nesta mensaxe, 60 escolares do CEIP de Portonovo e 31 persoas voluntarias do Club de xubilados de Portonovo e dos espazos +60 de Afundación sinalizaron distintos puntos da localidade co lema da campaña, «O mar empeza aquí» e informaron os viandantes sobre como cun escaso esforzo pola nosa banda, as pequenas accións do noso día a día poden ter unha gran relevancia.
Con idéntico obxectivo e, empregando a arte como ferramenta de concienciación, os escolares e voluntarios do clube de xubilados e dos espazos+60 Afundación pintaron na zona portuaria un muro deseñado pola artista Rakelle Cavallo, con pinturas fotocatalíticas que teñen a capacidade de absorber gases contaminantes. Deixaron así unha mensaxe permanente da importancia de actuacións preventivas como a iniciada hoxe en Portonovo para estender un compromiso común, consciente e constante, coas boas prácticas.
«EDUCACIÓN PARA A SOSTIBILIDADE»
O programa «Educación para a sostibibilidade», primeiro premio nacional de Medio Ambiente de CECA, promove o sentido de pertenza e de responsabilidade no coidado da contorna. Mediante unha implementación transversal a todas as áreas de Afundación, o obxectivo reside en inculcar prácticas sostibles entre unha xeración consciente e comprometida, e animar, con iso, a máis xente a sumarse a un futuro sostible. A partir dunha programación variada, dinámica e innovadora, proporciona coñecemento para entender os desafíos ambientais e empoderar aos máis novos para ser axentes de cambio, reforzando a súa autonomía e responsabilidade no camiño cara a un maior compromiso sostible.
Así, tanto mediante accións directas de voluntariado na limpeza de areais e costas a través do proxecto PLANCTON, retiráronse xa máis de 160 toneladas de residuos mariños desde o seu inicio en 2021. A cultura convértese tamén nun eixo vertebrador con estes mesmos fins a través de Naturnova, o centro de educación ambiental de Afundación, único en Galicia; promovendo actividades didácticas nas exposicións de contido ambiental; ou desenvolvendo iniciativas que axuntan prácticas sostibles con expresión artística como «Plantando árbores con pinceis». No ano 2025, máis de 200.000 persoas involucráronse a través de toda esta diversidade programática, coa Obra Social de ABANCA, na protección directa das nosas contornas.
MES DO MEDIOAMBIENTE
Afundación desenvolve unha completa programación durante todo o mes de xuño, no que se celebran algunhas das efemérides incluídas no calendario de conmemoracións internacionais da ONU, como o Día Mundial do Medio, 5 de xuño e o Día Mundial dos Océanos o día 8, para incidir así nas mensaxes que proxecta durante todo o ano a través do seu programa «Educación para a sostibilidade».
A programación deste mes inclúe distintas actuacións de limpeza de residuos e eliminación de especies invasoras desenvolvidas no marco de PLANCTON. A través deste proxecto poñerase en marcha tamén a cuarta edición de «Goza da praia sen deixar pegada», a campaña de boas prácticas para turistas, organizada en colaboración co sector pesqueiro galego, que chegará a Vilagarcía e O Grove; e estrearase unha nova campaña de «boas prácticas nos mercados portuarios».
O Centro Interactivo da Educación Ambiental de Afundación, Naturnova, situado en Vigo, tamén creou unha programación especial durante os meses de xuño e xullo, con xornadas de portas abertas e talleres. Así mesmo, para favorecer a divulgación e a participación activa, a área de Cultura da Obra Social de ABANCA programa durante todo o ano exposicións de contidos medioambientais nas propias sedes de Afundación, en espazos exteriores e nos concellos participantes no programa «Corrente cultural». O obxectivo é facer un chamamento á acción e á reflexión, apreciando a diversidade da natureza desde moi diferentes enfoques e asumindo a responsabilidade da súa conservación. Este mes de xuño pódese visitar na Coruña, Cedeira e Nigrán «Comedy Wildlife», e en Vigo «Miña nai!. Maternidades e crías no mundo animal».
Material audiovisual da presentación de hoxe, dispoñible AQUÍ